講到去荔枝角尋找美食，不少人除了D2 Place，都會深入工廈搵食，皆因租平吸引不少小店進駐，美食CP值經常令人有意外驚喜！當中尤其以「億利工業大廈」最多人搵，今次介紹的「金亞淶泰國餐廳」開業不夠1年，成功成為關注組的寵兒，皆因一道「火山骨」好食又夠打卡able！
位於億利工業中心1樓的「金亞淶泰國餐廳」，由泰國人主理，每人來到不少是為了大大份的火山骨，一份3到4條排骨肉的份量不少，煮得又夠淋身入晒味，容易拆出來吃，再加上萬用泰式酸辣醬汁，超級惹味，但辣度也不少，吃到後段嘴也有點麻，而且份量如此澎湃，亦只售$158。價錢甚至跟泰國出名食火山骨的Jodd Fairs有得揮！去Jobb Fairs食火山骨還要冇冷氣大排長龍，在這裡可以一解口癮。
還有柚子沙律的柚子份量也絕不手軟，加上集酸、甜、鹹、辣四種口味於一身的醬汁，灑了些炸魚仔，令沙律味道更豐富。而船麵湯底極濃郁但不是死咸那種，像喝到一點點藥材的味道，而且豬頸肉烤得非常軟嫩，幾乎入口即化，完全不會有韌的感覺。海南雞亦保持到泰式餐廳的應有水準。
除了火山骨，其甜品「椰皇三重奏」也十分有驚喜，甜品分為三層，分別是最上層烤香了的椰絲，中間超濃郁的椰汁糕和底層的椰青啫喱，單吃椰汁糕，那股超濃的椰香會十分澎湃，甚至會覺得有點膩，但配上清淡爽口的椰青啫喱就剛剛好，椰子香甜味加爽彈口感，為餐點劃上完美句號。
金亞淶泰國餐廳
| 電話 | 28893478 |
| 營業時間 | 11:30-21:30 |
| 地址 | 荔枝角長沙灣道883號億利工業中心1樓102號舖 |
▲ 即 Like Goodeal 早早鳥 專頁
▲ Follow Instagram @goodeal.hk 觀看精選內容
